అన్వేషణ

అన్వేషణ 

పదం పాడుతున్న 

ఆ వేణువు పాదాలను 

అన్వేషిస్తూ సాగేవే 

రాధ కన్నుల పయనాలు.

******

శకుంతల 

ఎంతమంది దుష్యంతులను 

సంపాదించుకుందో శకుంతలై 

పాపమా శరద్పూర్ణిమ.

******

చినుకు పాప  

ఆకాశమంత ఎత్తు నుండి 

జారిన ఆ చినుకంటి పాపకు 

దెబ్బ తగలనీయకూడదని 

ఎన్ని పచ్చటూయలలు కట్టిందో 

చూడా మాను కొమ్మ కొమ్మన.

*******

ప్రయోజకులు 

అంతగా గాలి తిరుగుళ్ళు తిరిగే 

తన బిడ్డలనెపుడింత ప్రయోజకుల్ని 

చేసిందో ఆ ఆకాశమని 

హర్షాతిరేకంలో తడుస్తూ 

పొగుడుతున్నాయా చెట్లన్నీ.

*******