వసంత శోభ

కాలాన్ని అరువిచ్చి పుచ్చుకుంటూ 

ఆ రుతువులు తనకు మాత్రం 

తరగని వసంత శోభను కట్టిపెడుతున్నాయంటూ 

మురిసిపోతోందా మృత్యువు.

******

అంత తొందరగా 

చెట్టు నీడను వదిలిపెడుతుందా 

బంధం బలమైనదైతే 

స్వేచ్ఛతో  పనేమిటంటూ 

ఆ ఎండుటాకు.

*******

బద్ద శత్రువులైన 

ఇద్దరు సమవుజ్జీల నడుమ 

అధికార బదలాయింపును 

ఎంత సులువుగా చేస్తుందా సంధ్య.

*******

అధికారంలోకి రాగానే 

ఇచ్చిన హామీని 

ఎంతందంగా నెరవేరుస్తుందో 

చూడా దీపం.

*******

ముత్యాలు

అన్ని ముత్యపు చిప్పలలో 

ముత్యాలుంటాయో లేదో గానీ 

అలాగుండే  అందరి కళ్ళలో మాత్రం.......

******

కాలానికన్నా తానెక్కువ 

కష్టపడుతున్నానంటుంది నా మనసు 

ఊహల్ని కలల్ని రుజువులుగా చూపుతూ.

********

నా అన్న వాళ్ళు నలుగురితో 

కలిసున్నానన్న ఆనందమే 

మకరందమయిందా పువ్వులో.

********

నాటి నాయికల అందాలు 

కావ్యాలకు కొత్త శోభలను తెస్తే 

నేటి నాయికల అందాలు గోడలకు 

నగ్న శోభలను తెస్తున్నాయి.

*******

సెలయేరు

ఒద్దికగా తన ఇంట్లోకొచ్చి 

వయ్యారాన్నే తన ఇంటి పేరుగా 

మార్చిందా వాన చినుకంటూ 

ఒంపు ఒంపునా గట్టుతో చెబుతూ 

పారుతుందా సెలయేరు.

********

అందమైనది గనుకే 

నా మౌనం 

దానికన్ని శత్రువులు.

******

తొలకరికా మట్టి 

పువ్వైందని 

వర్తమానమిచ్చిందా గాలి

నా మనసుకి.

******

ఎంత కాలమైనా 

నాలో నీ ఆనవాళ్ళు 

మాపడమనే విద్య 

అబ్బింది కాదీ కాలానికి.

*******

గత జన్మ

పూలకి

గతజన్మ 

జ్ఞాపకమా తేనెపట్టు.

******

నా మనసు లోతెంతో 

చెప్పగలిగేవి 

నా కన్నీళ్ళే.

*******

శ త్రువెంత సాధించినా 

విజయాన్ని ఆ శత్రువుకే 

అంకితమివ్వడం 

ఒక్క దీపానికే చెల్లింది.

*******

బ్రతకడానికి కాలంతో పాటూ 

పరుగెడుతున్న నన్ను చూసి 

 ఆయాసపడుతోంది నా నీడ

అవును నా కన్నా నా బ్రతుకు విలువ 

దానికే తెలుసు మరి.

*******

జీవితం

ఆ రెండు మెట్ల నడుమ 

లెక్కలేనన్ని  విన్యాసాలు చేసేదే 

జీవితమంటే.

*******

ఆ అడవి మానుల్ని అడిగి మరీ 

ఒక దాని వెనుక ఒకటి క్రమంగా 

వచ్చేవా రుతువులు 

ఇపుడడగడానికి అవి లేవనే 

బొత్తిగా క్రమశిక్షణ తప్పాయి.

*******

జీవితాల్లోకి తొందరొచ్చి 

శుభకార్యానికి సగం 

అశుభకార్యానికి  మూడొంతులు 

ఆయుష్షును తగ్గించేసింది.

*******

జీవితదశలు మారినంత 

నిదానంగా కూడా 

దశలు మారడం లేదా పాత్రలకు 

డైలీ సీరియల్లో.

*******

పేరంటం 

గడప దాటకుండానే అందరినీ

తన ఇంటి పేరంటానికి ఆహ్వానించడం

వచ్చిన వారందరినీ గడప దాటకుండానే

నిండు మనసులతో సాగనంపడం

మధువుతో పెట్టిన విద్యా కుసుమాలకు.

*******

శస్త్ర చికిత్సను ఎంత సులువుగా

చేయొచ్చో ఆ డాక్టర్లకు

నేర్పుతుందా తామరాకు

పురుడు పోస్తూ ఈ నీటి బొట్లకు.

*******

మనసు కరిగేలా మాటాడితే

ఫలమెంత మధురంగా ఉంటుందో అని

అంటుందోయ్ ఆ మట్టి

మొలకలై మొలిచి.

********

జారిన చినుకే

పండి అలా పండక ఇలా

ఇంకో రెండు చినుకులను

సంపాదించడమే వ్యవసాయం.

*******

పరిచయం 

నా అడుగులనెంత లోతుగా

పరిచయం చేసుకుంటుందో

ఆ కడలి తీరం

ఎంత లోతుగా నా లోకి

అడుగులు వేస్తూ పరిచయమౌతుందో

ఈ పూలహారం.

*******

ఎవరెస్టుకు జాబిలికీ కూడా

దగ్గరైన పాద ముద్రలు

పాపమెందుకో

దూరమౌతున్నాయా పంట చేలకీమధ్యన.

*******

తొలి సంధ్య వెలుగునా కాన్వెంటులు

మలిసంధ్య చీకట్లనా వృద్ధాశ్రమాలు

ఎంతందంగా దక్కించుకుంటున్నాయో.

*******

నడకలు నేర్పడంలో

వాన చినుకుకు సాటెవ్వరంటూ

చూడా మన్ను.

*******

లాకర్లలో

ఆ పూల మనసులు దాచే

బ్యాంకా తేనెపట్టు.

*******