Follow by Email

Thursday, December 26, 2013

కుటుంబం

కుటుంబం
గోడకు వేలాడే పటంలోని 
నలుగురు ఏరంటే!
ప్రపంచపటం లో చూపుతూ 
గొప్పలు పోయే కుటుంబాలెన్నో! నా భారతాన. 
*******
చందమామలు 
భేతాళ కథలు వింటూ 
కాలం గడపాల్సిన చందమామలు 
భుజానేవో మోసుకుంటూ 
కాలంతో పరుగెడుతున్నాయి. 
*******
మద్యం సీసా
ఒంటి నుండి, కంటి నుండి 
జారే బొట్టుబొట్టు ను తనలోకి జార్చుకుంటూ 
భలేగా గుప్పుగుప్పుమంటుందిలే 
ఆ మద్యం సీసా. 
*******
ఇంద్రచాపం
ఒకరి మనసులోకొకరు తొంగిచూసే ఇంద్రజాలం!
 మాలా మీ అందరికబ్బితే 
ఎన్ని ఇంద్రచాపాలీ లోకాన అని అంటున్నాయోయ్ 
ముక్త కంఠాన ఆ ఎండావానలు . 
********

Friday, December 20, 2013

చెలీ!

చెలీ!
మింటిలోని ప్రతి తారలోను 
నీ రూపునూహించినాను.
నల్లబడి నిండు జాబిలి 
మన పెళ్లి వేళ 
నీ బుగ్గన చుక్కౌతానన్నది! ఓ చెలీ!
*******
నీ వాలుచూపులు నాకై రాసిచ్చిన 
వీలునామాను చదువుకునే వేళ!
అంత వణుకెందుకే చెలీ 
నీ పెదవులకు 
*******
గుప్పెడు మల్లెలకు వరమిచ్చి 
గంపెడు శరాలను ఎక్కుపెట్టి 
అడుగైనా కదపలేని తనాన్ని 
బహుమతిగా ఇచ్చావేమి
నా మనసుకో చెలీ!
*******
పండు వెన్నెల్లో 
ఆ కలువను మించి విరిసిన 
నీ ముఖకమలాన్ని చూస్తున్న నిండు జాబిలిని 
కాస్త నిదానించమన్నాను ఓ చెలీ!
********

Thursday, December 19, 2013

అహం!

అహం!
అహం! నా కంటి రెప్పేయనపుడు 
చూపుల నుండి ఎన్ని అందాలను 
తప్పించేసిందీ కాలమన్నది 
నలుగురిలోనూ చెల్లని నాణెమైనప్పుడు గానీ 
తెలీలేదు నాకు 
ఐనా తెలివిన పడక ఎక్కడెక్కడి దూరతీరాలలోనో 
ఒంటరిగా సాగడం నేర్చాను 
అడుగడుగునా ఎదురౌతున్న నాలాటి వారెందరినో చూస్తూ 
పరిచయం లేకున్నా 
ఎవరికీ వారు అహమనే ఏకసూత్రబద్దులే అంటున్నాను. ఏమంటావ్?
బాబ్బాబు! ఆవును కాదనలేని ప్రశ్న వేసి 
మరో అంతర్యుద్ధానికి నా మనసుని వేదిక చేయకు ప్లీజ్. 
**********

Monday, December 2, 2013

శంఖం

శంఖం
రహస్యాలను! నా కన్నా శ్రావ్యంగా
ఎవరు చెప్పగలరోయ్ నీ చెవిలో
అని అడుగుతున్న ఆ శంఖాన్ని చూస్తూ
అంత కన్నా తెల్లగా పాలిపోయింది
నా ప్రియురాలి ముఖం.
******
పండుటాకులు
గిట్టి, రాలిపోయినా!
తమ పరిచయాలకు పలకరింపులకొచ్చిన
లోటేమిటంటున్నాయి!
పారుతున్న ఆ సెలయేటి అండ చూసుకుంటూ
ఆ అడవి మానుల పైని పండుటాకులు.
*******
చెరువు ఆటలు
క్షణం తీరిక లేకుండా మా ఊరి చెరువు
గాలికాడుకునే ఆటలే
ఆ గట్టుకు చేరేసరికి పాటలౌతున్నాయి.
*********

తొలి లేఖ
విరబూసిన పూదోటకెలా అప్పగిస్తానో!
సెగలు గ్రక్కే ఎడారికీ అలానే అప్పగిస్తాను
నా మనసు కళ్ళాలనని,
నా కంటికే తనింటి పిలుపుల
తొలిలేఖనంపుతుందీ ప్రకృతి.
*********
మనసులు
సుక్ష్మజీవులను చూడగలుగుతున్నాం కదా అని

అంత కన్నా సుక్ష్మంగా, అంతరిక్షాలను అందుకోగలుగుతున్నాం కదా అని
అంత కన్నా దూరంగా మనసులను విసిరేసుకుంటే ఎలాగోయ్.
**********

Wednesday, November 6, 2013

పెరుగుతూ ...

పెరుగుతూ ...
పెరుగుతూ  మనిషే కాదు!
ఊరు కూడా ఈ మధ్యన 
ఆ వల్లకాటినే చేరుతోంది. 
******
గుభాళింపు 
ప్రతీ మనిషి పీల్చే గాలిలో 
క్వార్టర్ వంతైనా! మద్యం వాసన ఉండేలా 
గుభాళిస్తున్నాయి మనగవర్నమెంట్లు. 
*******
పసిడి వైభోగం
ఆ! తాళి బొట్టుకైనా 
ఇంకెన్నాళ్ళు లేవోయ్ 
ఈ పసిడి వైభోగం.
*****
తమల పాకు
ఊరంత విస్తరేసి ఆ కొండ చేసిన 
అందాల విందారగించి వచ్చిన నా మనసుకు 
పున్నమి వెన్నెల తళుకుమంటున్న ప్రతి ఆకు!
తమలపాకే. 
******

Friday, November 1, 2013

గుడ్డిదీపం

గుడ్డిదీపం
గుడ్డి దీపమైతేనేమోయ్!
గుడిసెలోని వారికి 
కళ్లిచ్చిందది!. 
****
 శకటాలు
మనుషులనే దీపాలు వెలిగించుకుని 
పగిలిన గుండెలే టపాసులంటూ 
దీపావళి పండుగ చేసుకుందా శకటం.
******
అనాకారి
అణాలు కాణీలు ఉన్నపుడు 
ఇంత అనాకారిగా లేవు!
రూపాయిలొచ్చాక రూపు మారిన అనురాగాలు. 
*******
పెరుగుట విరుగుట .....
పెరుగుట విరుగుట కొరకే 
అన్న సామెత కాస్తా 
పెరుగుట కొనే వారి నడ్డి విరుగుట కొఱకే 
అన్నట్లుగా తయారైందీ మధ్యన. 
******
బ్లాగ్మిత్రులందరికీ దీపావళి శుభాకాంక్షలు

Wednesday, October 30, 2013

హస్తభూషణం

హస్తభూషణం
పుస్తకం హస్తభూషణమని అన్నందుకు 
నన్ను చెరసాలలో పెట్టాలంటోంది 
నా చరవాణి. 
******
విలువలు
గోడలు దాటి విజ్ఞానం బయటకు రానపుడు 
గుండెలు దాటి లోనికెలా పోతాయోయ్
విలువలు. 
******
బలం
నమ్మడానికి 
ఇంత తేలికపాటి మనుషులు దొరికే ఈ దేశాన
అబద్ధాలకు వేయిటన్నుల బలమెందుకు?
******
గస్తీ 
ఆడది... అర్ధరాతిరి.... స్వేచ్ఛ.... 
అని ఆనాడు ఆ మహాత్ముడు అన్న మాటను 
నిజం చేయడానికి, కర్ర చేతపట్టి 
గల్లీగల్లీ లోను గస్తీ తిరగాలేమో 
ఇపుడా గాంధీ విగ్రహాలు
*******

Thursday, October 24, 2013

ఉల్లి

ఉల్లి
కొస్తే కాదు చూస్తుంటేనే 
చూస్తుంటేనే కాదు అంటుంటేనే
అంటుంటేనే కాదు వింటుంటేనే!
ఎన్ని దారులో చూశావా 
నా కంట నీరు తెప్పించడానికా ఉల్లికి. 
********
దారిద్ర్యం 
దారిద్ర్యమే పట్టకపోతే!
అంతటి వైభోగమెక్కడిదా నటికి 
అదేనోయ్ వస్త్ర దారిద్ర్యం. 
*******
దృశ్యకావ్యం 
గట్టుమీది కొబ్బరాకును కలంగా పట్టి,
ఈ చెరువు నీటిని సిరాగా పోసి 
నే రాసిన దృశ్యకావ్యాన్ని!
వీక్షిస్తూ మురిసిపోయే మనసులెన్నో 
ఈ పున్నమిరాతిరిన
********
పరిమళం  
తొలకరిన ఆకులను పూయించిన 
ఆ వాన చినుకులను!
ఏవి ఆ పూలపరిమళాలని అడిగానో లేదో!
నా మనసుని పల్లవిస్తూ తాను కరిగిందా మన్ను. 
********

Tuesday, October 22, 2013

మృగతనం

మృగతనం
లేత అద్దాల చెక్కిళ్ళలో 
అప్పుడప్పుడు, అక్కడక్కడ మృగాలు కొన్ని 
మగతనం చూసుకుంటున్నాయి 
*******
కాలం చెల్లిన ఆభరణాలు
ఆటపాటలనే కాలం చెల్లిన ఆభరణాలు 
తనకొద్దంటూ, ఎంత కళావిహీనంగా 
పరుగు పెట్టేస్తోందో చూడీ బాల్యపు విజ్ఞానం 
********
కరుణించే  మనసు
విసురుగా కురిసే వాన చినుకులకు 
పుడమిని చీల్చే పదునెక్కడిది,
కరిగి కరుణించాలనే వెన్నలాటి మనసు 
ఈ మన్నుకు లేకుంటే. 
*******
అహం
ఎక్కడలేని గౌరవాన్ని 
నీకు తెస్తానన్న ముసుగులో,
నీకు నిన్ను దూరం చేసేదే అహం. 
*******

Sunday, October 6, 2013

జోలపాట

జోలపాట
నడిరోడ్డుపై, కాసింత కారుణ్యానికై
వేదనతో జోలె పడుతున్న తల్లి
ఆక్రందనలో పడి,కొట్టుకుపోతున్న జోలపాటనెలా పట్టుకుని
నిద్దరోతోందో ఆ ఒడిలోని శిశువు.
*******
ఐకమత్యం
నేటి కాలాన
ఐకమత్యం సాధించే
నిష్ఫలమేమిటో చెప్పనా!
పూలన్నీ దండగా మారి,
దండగమారి నేతల పాల్బడడమే.
********
మానవత
అన్ని కన్నీళ్ళను చల్లినంత మాత్రాన
సొమ్మసిల్లి పడిపోయినా మానవత
లేస్తుందా? చెప్పు.
*******
అద్దం
కదలకుండా నిలబెట్టి
నన్ను నిలువుదోపిడి చేస్తూనే!
తనపై నవ్వుల పూలు వేయించుకునే
కళనెక్కడ నేర్చిందో ఈ అద్దం.
*******

Friday, September 20, 2013

ఉరికొయ్యలు

ఉరికొయ్యలు
ఆడది నిర్భయంగా తిరగాలంటే 
ఉరికొయ్యలకు తలలు పూయాల్సిన ఖర్మ 
ఇంకెన్నళ్లో నా భారతాన. 
******
చందమామ
చూపుల పాలనకెంత దూరమైందో 
నింగిలోని ఆ నిండు చందమామ 
లేత చేతుల లాలనకు అంతే దూరమైంది 
ఈ కథల చందమామ. 
*******
పూనకం
గుడిలో అజ్ఞానమనిపించుకుని 
పబ్బులో విజ్ఞానమనిపించుకునేదే!
పూనకం. 
*******
ప్లాట్ 
పొలం కట్టిన 
పచ్చని చీరను 
పచ్చనోట్లు విప్పేస్తున్నాయి. 
*******

Monday, September 16, 2013

జాబిలి -కలువ

జాబిలి -కలువ
నీ చెక్కిలిపై విలాసంగా నవ్వుతున్న 
నన్ను నేను చూడకనే 
కలువలై విచ్చిన నీదు కన్నుల జూచి!
ఎక్కడా? ఆ నిండు జాబిలని వెతికాను. 
*******
కొంటె కోణంగి
కవ్వించి, కవ్వించి నింగి వెలుగులను దాచేసే 
ఆ కొంటె కోణంగేనా! 
కరిగి, కొసరి కొసరి ఇన్ని అందాలను 
దానమిచ్చేదీ అవనికి. 
*******
గుణపాఠం
ఎదురు లేదంటూ చెలరేగే గాలికి, 
వెదురు తగిలి నేర్పే గుణపాఠం 
ఈ జన్మకు మరువగలవా నువ్వు. 
*******
చిరంజీవులు
పూస్తున్న ఉరికొయ్యల సాక్షిగా,
నా దేశాన! ఆడదాని భయము,
మగవాడి అహంకారము రెండూ చిరంజీవులే.
 *********

Wednesday, September 4, 2013

నాగరికత

నాగరికత
అవమానం అనుకోపోతే 
నాగరికతకు నేటి ప్రమాణమేమిటో చెప్పనా!
నడిరోడ్డుపై పోతున్న మానమే. 
******
వానచినుకులు
బాటసారులై 
గగనపు వీధుల సంచరించే 
కారుమబ్బులకు పట్టిన 
చెమట చుక్కలేమో ఈ వానచినుకులు.
ప్రజ్ఞలు 
వెలుగులోకొచ్చే స్థోమత లేక 
కొన్ని ప్రజ్ఞలు, ఎంత చీకట్లు మిగిల్చాయో 
నా భారతాన. 
******
ఆత్మహత్య
కావాలని చమురొంపుకుంటున్నాయి 
కొన్ని దీపాలంటూ 
ఉసూరుమంటున్నాయి 
రేపటి వెలుగులు. 
******

Wednesday, August 28, 2013

నిజం

నిజం
నీ కన్నుల కన్నా 
ఎక్కువ లావణ్యాన్ని సంపాదించాలని కాబోలు 
ఆ పూవులన్నీ అప్పుడే ముడుచుకున్నాయి 
రోజు గడిచింది. నిజం తెలిసింది. 
బాధతో అవి వాడిపోయాయి. 
*******
ఏకాంతం
నా ఏకాంతాన్ని చూసి 
జాబిలి మబ్బు చాటైతే,
కలువ ఏకాంతాన్ని చూసి 
ఆ మబ్బు కాస్తా కరిగి 
నీపై నా సందేశాన్ని కురిపించింది. 
********
ఎదురుచూపు 
తొలిపొద్దు లో ఆకాశంలో రేగిన విప్లవానికి 
ఆదిమూలం, నీకై ఎదురుచూస్తూ విసిగిపోయిన 
నా హృదయం కాక ఇంకేమిటి?
********
ఆమె
ఎందుకు ఆకాశం లోకి 
అదే పనిగా చూస్తావు అని ఆమెనడిగాను. 
చూడనీ ఆమె తన చూపులతో 
నక్షత్రాలను వెలిగిస్తుంది 
అని ఆకాశం బదులిచ్చింది. 
*******
జ్ఞాపకాలు
అమ్మో! నీ జ్ఞాపకాలను లెక్కించడమంటే 
నూరేళ్ళ నా శ్వాసలను 
తారలతో గుణించడమే 
ఐనా ................. 
*******

Friday, August 23, 2013

కృష్ణబిలాలు

కృష్ణబిలాలు
పసినవ్వుల 
కృష్ణబిలాలు 
కాన్వెంటులు. 
****
మాతృభాష
బొడ్డుపేగులోనే 
కాలపాశమెదురయితే 
బ్రతికి బట్ట కట్టేదెలా?
అంటున్న బేల లా అయింది 
నా మాతృభాష. 
******
రాని యవ్వనం
పొగలు, పొంగే నురుగులను 
తమ ప్రాథమిక హక్కులంటూ,
వీధుల్లో ఎలా విహరిస్తున్నాయో చూడు 
రాని యవ్వనాలు కొన్ని.
*******
మనిషి
మనిషి, ఎదుట పడ్డపుడు పట్టాభిషేకమూ,
ఎడం కాగానే పోస్టుమార్టమూ
అలవాటైపోయింది నాలుకలకీమధ్యన. 
********

Wednesday, August 14, 2013

విరుల ఆనందబాష్పాలు

విరుల ఆనందబాష్పాలు
నిండు జాబిలే దిగొచ్చి 
వెన్నెల బొట్టెట్టి తన ఇంటి పేరంటానికి 
తమనాహ్వానించిందంటూ ఆ పూబాలలన్నీ,
తమ పై వాలిన మిణుగురులతో కల్లలాడువేళ!
కలలో నుండి  మేలుకున్న నాపై !
నవ్వుతూ అన్నైతే నీటి ముత్యాలను రాల్చి ఆ విరులన్నీ!
అందంగా నే కన్న కలకు 
వాని కన్నుల జారే ఆనందబాష్పాలని అన్నాయి. 
*******
సంజె సిగ్గు
నా చూపుటింటి లోకి 
తొంగి చూస్తున్న సంజె చెక్కిలిపై 
కనురెప్పల పెదవులతో నే ముద్దిడినంతనే 
విశాల గగనమంతటి సిగ్గొచ్చెనామెకు. 
*******
ఆట పాట
మేధావుల నాల్కలను పట్టుకుని 
వేలాడుతున్నాయి పాపం! 
చిన్నారులను అలరించాల్సిన ఆట పాట. 
********
వాల్జడ
అన్ని పూతలతో! విరబూస్తుంటే ఆమె గారి ముఖం 
నువ్ చేసిన పాపమేమిటే? 
కోతలతో, ముస్తాబుకు 
ఆమడ దూరాన ఆగావు! ఓ వాల్జడ. 
******
బ్లాగ్మిత్రులందరికీ స్వాతంత్ర్యదినోత్సవ శుభాకాంక్షలు

Monday, August 12, 2013

సిగపట్లు

సిగపట్లు
నన్ను సేద తీర్చాలని 
పాపం! తానెలా సిగపట్లు పడుతోందో చూశావా 
ఆ గాలి ఈ తోట లోని మానులతో. 
*******
తెలుగు భాష
ఉచ్ఛారణలో మనం సగం ఊపిరి తీస్తుంటే 
ఉదాసీనతలో తాను మిగిలిన ఆ ఊపిరిని 
పోగొట్టేసుకుంటోందా తెలుగుభాష. 
********
దీపం
చీకట్లోంచే వెలుగు పుట్టిందని చెప్పడానికో!
లేక ఎంతటి వెలుగైనా 
చీకటిపాల్ కావలసినదే అని చెప్పడానికో!
అలా ఆ చీకటినే చెంతనుంచుకుని వెలిగేది ఆ దీపం. 
*******

పసిపాపడు 
మాయమౌతూ ఆ నక్షత్రాలు వదులుకున్న 
తళుకులను ఒడిసిపట్టుకుని మరీ 
అమ్మ ఒడిలోంచి నిదుర లేస్తున్నట్లున్నాడు 
ఆ పసిపాపడు
********

Tuesday, August 6, 2013

అంతరంగపు చిటపటలు

అంతరంగపు చిటపటలు
ఆకాశపు చిటపటలకు మౌనాన్ని నేర్పి 
తనను తాను పండించుకున్న ఆ బీడులా ఐతే 
ఎంత బావుణ్ణు నా మనసు,
అంతరంగపు చిటపటలకు 
మౌనాన్ని నేర్పుతూ. 
*******
ముదుసలి అందం
ఆ ముదుసలి అందం 
ఎడారి చందం అని అందామంటే 
చెరగని గురుతులేవో 
మాసిపోని చెలమల ఆనవాళ్లనద్దుతున్నాయి. 
********
దీపం
మంచి చెడులను 
తూకం వేస్తుందా దీపం 
తలకాడెలుగుతూ. 
*******
వెలిగే కనులు
సహనంతో ఆమె కళ్ళు 
సరదాకి ఆ సహనాన్ని కొన్నానన్న 
ఆనందంతో ఆతని కళ్ళు 
ఇరుసంధ్యలై వెలుగుతున్నాయి 
ఆ చీకటి గదిలో. 
*******

Thursday, August 1, 2013

మరుభూమి

మరుభూమి
ఆరిన దీపాలతోనే 
దీపావళి చేసుకుంటుంది 
ఆ మరుభూమి. 
*****
ఊహలు
విషాదాన్ని వేరు చేసి 
నాతో ఆనందపానం చేయించే 
హంసలు కాదటోయ్ 
నా ఊహలు. 
*****
విషాదం
ఎన్ని అశ్రుధారలనైనా 
కాదనక సేవించింది గానీ 
రెండంటే రెండు ఆనందబాష్పాలు 
తన గొంతు జారక 
ఎలా ఉక్కిరిబిక్కిరి అవుతోందో చూడా విషాదం. 
*******
విలువలు
నాధుడనే వాడు వదిలేసాడని 
ఏనాడో పుస్తకమనే పుట్టిల్లు 
చేరాయా విలువలు. 
*******
కల
బద్దలై పోతున్నట్లు 
తెల్లారుతుండగా కలొస్తోందంటూ 
బావురుమంటున్నాయా కొండలీమధ్యనెందుకో 
*******

Monday, July 29, 2013

సాహసం

సాహసం
నా సాహసం 
ప్రియురాలి
 బుగ్గ ఎరుపు
****
మెరుపు
పేదవాడి 
ఆనందం
ఆకాశంలో మెరుపు
****
రంగవల్లి
రోజు రోజుకు 
 చెరిగిపోతున్న రంగవల్లి 
అడవితల్లి
****
కొత్త అత్తరు
మార్కెట్ లో 
కొత్త అత్తరు 
మట్టివాసన 
****
పరిణామం
అమ్మ గర్భం 
అద్దెకు 
ష్!.... పరిణామం 
*****
నూత్నదాంపత్యం
ఆమెతో ఆమె 
నాతో నేను 
నూత్నదాంపత్యం 
****
గూళ్ళు 
పిచ్చుకల గూళ్ళు 
పురాణేతిహాసాలు 
****
మూడ్
చావు, పుట్టుక, లంచం 
జీవితానికి 
'మూడ్' ఉండాలోయ్ మరి 
******

Thursday, July 25, 2013

శ్యామలధ్వజం

శ్యామలధ్వజం
శ్యామలధ్వజాన్ని 
పైకెత్తాయా చేలో 
చేయి చేయి పట్టి ఆ వానచినుకులు. 
*******
కొబ్బరాకు
వెన్నెల పట్టాభిషేకం చేసిన 
నా పెరటి తోటకు 
మకుటమై తానమరిందా కొబ్బరాకు ఛాయ. 
*******
లోటు
ఆమె మోస్తున్న కడవలోకి తొంగి చూస్తూ 
తనకు కాళ్ళు లేని లోటును 
పూడ్చుకుందా ఆకాశం. 
********
ముఖాముఖి
అదేమిటో! మాటలు సాగవు 
మౌనాలు మిగలవు 
నేను నా మనసు ముఖాముఖి ఎదురుపడినపుడు. 
********
ఎవరో!
ఆదమరచి  హాయిగా నిదరోతున్న 
ఆ తోటలోని అందాలపై అన్ని ముత్యాలు చల్లి
తెల్లారకుండానే నిద్ర లేపిందెవరో!
*********

Saturday, July 20, 2013

రాదారి

రాదారి
నిదురన్నది కూడా పోకుండా, తను చెప్పే ఊసులన్నిటినీ
 కదలక కూర్చుని వింటున్న ఆ మైలురాళ్ళ గొంతుతో 
తాను బదులిస్తుందా రాదారి!
చేరాల్సిన దూరమెంతని నేనడిగినప్పుడల్లా. 
********
సంస్కృతి
రంగురంగుల దీపాల కాంతులు 
తనను చీకట్లోకి సాగనంపుతుంటే 
నా కనుజారే కన్నీటిబొట్టుతో 
తాను సాగిపోతోంది నా దేశ సంస్కృతి 
ఆ పబ్బుల పుణ్యమా అంటూ. 
********
కాటుకరేఖ
దిద్దుకునే కాటుకరేఖ 
నల్లగానే ఉండాలా అంటూ 
అడుగుతుందా ఆకాశం 
కారుమబ్బుల కన్నులతో ఉరిమి చూస్తూ. 
********
జ్ఞాపకాలు 
అంతరంగం కడలై 
కన్నీళ్లు అలలైతే 
అందు మేలిమి ముత్యాలు కాదా 
నీ జ్ఞాపకాలు. 
*********

Monday, July 15, 2013

ఆశ

ఆశ
నానిన ఎన్నో చొక్కాల తళుకులద్దుకుని!
తాను మెరిసి మాయమైపోయింది ఆ చొక్కా!
ఆశ పడకూడదా శ్రమలంటూ. 
********
గోదారి 
ఉన్ననాడా చేలో, లేనినాడా ఇసుకతెన్నెలపై
కమనీయంగా విందునొడ్డించి 
తానెంత మనసున్నదానినో 
చూడమంటుందా గోదారి. 
*******
అనుభవాలవిందు
కడుపునిండా తినకుండా 
తనకు తానే ఎంత బరువై తోచిందో,
కడుపునిండుగా మెక్కి 
తానంత తేలికైపోయింది నా మనసు!
అనుభవాలు విందు చేసే వేళ. 
*********
విలువలు 
వినోదాల విపణి వీధులకి!
హరివిల్లు వర్ణాలద్దుతున్నాయి 
తాము వివర్ణమై ఆ విలువలు. 
*********

Tuesday, July 9, 2013

చెలిమి

చెలిమి
చీకటితో! రాతిరి చేసిన చెలిమికి 
అక్షర రూపమీయడానికి 
సిరా చుక్కలుగా, ఆకు చివర్లనుండి జారుతున్న 
నీటిబొట్లను పోగేసిందా వనం. 
*********
సమాధులు 
అందమైన సౌధాలెన్ని!
సమాధులై వెలిశాయో చూడు!
తొలకరినాటి మట్టి పరిమళంపై. 
********
పాతివ్రత్యం
నాడగ్గి దూకిన 
పాతివ్రత్యం నేడు
ఆమ్లాన క్రాగుతోంది. 
******
ఏడడుగులు
లోకకళ్యాణం కోసమంటూ 
ఏడడుగులు వేస్తున్నారా నేతలు!
అవినీతితో. 
*******
ఉరితాళ్ళు 
వలువలు జారి 
ఉరితాళ్ళయినాయోయ్
విలువలకు. 
******

                                                                                                                                                                                                          

Thursday, July 4, 2013

స్వప్నాలు

స్వప్నాలు
నే కన్న కలలన్నీ కరిగి 
కనుజారి అలలైనాయని తెలిసి 
చూడా సంద్రం తను కన్న 
స్వప్నాలనెలా దాచుకుందో, ముత్యాలుగా. 
********
స్వేచ్ఛ
తనను అణచి కూడా 
ఆకాశమంత స్వేచ్ఛనిచ్చింది 
ఈ మన్నేనని కాబోలు 
మానైనా ఈ మన్నునొదలదా విత్తు. 
********
బాల కార్మికులు
చమురంతా బయటకే ఒలుకుతుంది కనుకే 
చీకటిని గడప దాటించలేని దీపాలు 
ఆ బాలకార్మికుల నయనాలు . 
********
ఆచారాలు
మెట్టినింటి ఆచారాలను 
ఎంత అలవోకగా నేర్చుకుంటుందో చూడా నది 
సాగరాన్ని సమీపిస్తూనే. 
*********

Saturday, June 29, 2013

ఎవరు వారు?

ఎవరు వారు?
ఇక దాని బ్రతుకంతమొంది గోడల మధ్యనే గడిచి పోతుందనుకున్నాను 
రోదనే తప్ప దానికిక నవ్వే యోగమే లేదనుకున్నాను 
కానీ ఉన్నట్టుండి దానికెవ్వరో పట్టాభిషేకం చేసారు 
ఇపుడది చిందించే హాసాన ఈ లోకమే మెరిసి మురిసిపోతోంది 
ఎవరు వారు? కంటికి రెప్పలై, ఇలా ఆ మానవతకు పట్టం కట్టినవారు 
వారించలేని కల్లోలాన్ని పీడకలలా మలచిన వారు 
విలాసంగా నవ్వుతున్న మృత్యువు వెన్నులో వణుకు పుట్టించిన వారు 
ఎవరు వారు? ఆత్మీయతకు అద్దం పట్టినవారు 
ఆప్యాయతలో అమ్మనూ మించిపోయినవారు 
అడవి దారుల పట్టి పోతున్న సమాజానికి అసలు దారిని చూపినవారు 
ఎవరు వారు? కోతల్లోని మాటల రాయుళ్ళకు 
మనుషులను చేరడమెలాగో చేతల్లో చూపినవారు 
ఆదుకోవడమే ఆయుధానికి పరమార్ధమని చాటినవారు 
ఇరుకిరుకు దారుల, మనసుల మూలల్లోకి చేరినవారు 
ఎవరు వారు? దేవుడే దిక్కంటూ మ్రొక్కిన వారికి దిక్కైన వారు 
విలువలకు దిక్సూచి ఐనవారు 
మనుషులుగా మనలను గుభాళించమన్నవారు 
ఎవరు వారు? నిన్నటి రోదనల మాటున రేపటి నవ్వులను బ్రతికించిన వారు 
ఉలికిపడిన జాతి గుండెనూరడించినవారు 
అమ్మ పాల ఋణాన్ని ఇంత చక్కగా తీర్చుకున్నవారు 
ఎవరు వారు? చావు బ్రతుకుల సరిహద్దు సీమలను 
సాహసంతో సమీపించి 
ఆ దేవుని కన్నా ఓ మెట్టు పైన నిలబడినవారు 
అమృతం కూడా ఈయలేనంతటి అమరత్వాన్ని 
మానవత్వపు మాటున అందుకున్న వారు 
ఎవరు వారు? ఎవరు వారు?
**********

Sunday, June 16, 2013

మానవత్వపు భంగపాటు

మానవత్వపు భంగపాటు
అమ్మ లాలనను ఇంకా మరచిందో లేదో గానీ 
అపుడే ఓ ఇంటి పాలనను అందుకుందది 
మది తలపులను, గడియపెట్టిన ఇంటి తలుపులను దాటనీయని విద్య నేర్చింది 
అద్దం లాటి ఆ చెక్కిళ్ళపై పడిన ఐదువేళ్ళ ముద్రలు 
అద్దంలా అది మెరిపించిన ఆ ఇంటి గచ్చున మచ్చలుగా  ప్రతిబింబిస్తున్నాయిప్పుడు
పాపం! ఆకలికి దాని హక్కులన్నీ జీర్ణమైపోగా,
ఆ ఇంటి వాళ్ళ అంతులేని అధికారపు దాహాన్ని అలుపెరుగక తీర్చినట్లుంది దాని దేహం 
ఒంటిని కప్పుకోలేని దాని దారిద్ర్యానికి మనసాపుకోలేక, ఆ ఆసామి చేసిన అఘాయిత్యానికి
ఆ గది నాలుగు గోడలు ఉలికి పడ్డాయి 
ఎందరిలానో చావుతోనే అదృష్టం వరించింది దాన్నీ 
ఎప్పటిలానే పత్రికల పతాకానికెక్కింది
నోరుందని అందరూ అరిచారు మాటల తూటాలూ పేల్చారు 
జరుగుతున్న తంతునంతా చూస్తూ 
 వికసించే తరుణం వచ్చేసిందనుకుంది ఆ మానవత 
కాసేపటికే తాను ఆవిరై పోతానని ఎరుగక 
అవును! ఎవరి తొందరలు వారివి మరి 
అంతేలేవోయ్ దగాపడిన జీవితానికిక్కడ విలువేముందని 
అందరూ పంచుకునే ఓ ఐదు నిముషాల కాలక్షేపం తప్ప 
ఆ!ఆ! ఆ ఐదు నిముషాలు ఐపోయాయి ఇంకా ఆలోచించకు 
ఆలోచించే వారిని వెక్కిరిస్తూ, పద వెనువెనుకకు  పోతూ 
ఆదిలో మనం విడిచొచ్చిన అడవులను చేరదాం 
అక్కడ ఆశా ఉండదు, భంగపాటు ఉండదు ఈ మానవత్వానికి. 
*********
 

Thursday, June 13, 2013

దినపత్రిక

దినపత్రిక
రాలక, సుడిగాలి పలకరించిన ఆనవాళ్ళను 
జీవితాంతమూ మోస్తూ కుమిలిపోతున్న 
పసి మొగ్గల తో తానలంకరించుకుంటుంది 
ఆ దినపత్రిక. 
*********
నల్లటి నీడ
అనుబంధాల హరివిల్లు వర్ణాలపై 
నల్లటి తన నీడ పడేంతగా 
ఎదుగుతుంది రూపాయి. 
********
కిరీటం
తనకు కిరీటమెందుకనుకుంది గానీ ఆ వెలిగే దీపం 
లేకుంటే నీ చిరునవ్వు 
నాకెందుకు దక్కేది! ఓ చెలీ!
*********
నోటుకై .....
భారతి కంట చుక్కలొలుకుతున్నా
చుక్కల సీమలొంకకు పయనమౌతున్నారు 
రూపాయిలు రాలే నోట్లకై ఎందఱో. 
*******

Wednesday, June 12, 2013

కన్నతల్లి

కన్నతల్లి
ఎంచక్కా చెరువు ఒడిలో పసి పాపలా 
కూర్చుందా మేఘమనుకునే లోపే 
కరిగి తానే ఈ చెరువు కడుపు నింపే కన్నతల్లైపోయిందే. 
*********
వ్యాపార కుసుమం
దేహాలపై విరబూస్తూ 
భరించలేని దుర్గంధాన్ని వెదజల్లుతుందేమిటోయ్
ఈ వ్యాపార కుసుమం. 
********
విజ్ఞానపు వెలుగు
వినాశనమనే చీకటిని సృజియిస్తూ 
దీపంలా వెలిగి పోతోందీ విజ్ఞానమని అనుకుంటున్నాయి 
తమలో తామా పంచభూతాలు. 
********
కాంక్రీటుగోడలు
భవిత పేరు చెప్పి 
పరిమళించాల్సిన బంధపు సుగంధాన్ని 
ఆఘ్రాణించేస్తున్నాయి నాలుగు కాంక్రీటుగోడలు. 
**********

Monday, June 10, 2013

పాశుపతం

పాశుపతం 
కాల మహిమో, కాదనలేని సమ్మోహనమో కాపోతే
లేలేత పసి నాల్కలే, పాశుపతాలై 
పంచప్రాణాలు తీసేయడమేమిటోయ్ నా తెలుగుతల్లివి. 
*********
కాన్వెంటులు
దాంపత్యం మొగ్గేస్తే చాలు 
ఎన్ని పిల్లిమొగ్గలు వేస్తున్నాయో చూడవోయ్ 
ఆ కాన్వెంటులు. 
********
ముచ్చటైన గృహాలు
అమాశ రాతిరి తారలన్ని ఉండేవి నాడు. 
నడుమ పున్నమి రాతిరన్ని ఐనాయి. 
నేడో! వలసదెబ్బ తిన్న పల్లె వాకిట వెలిగే 
వీధి దీపాలన్నీ కూడా లేవు గదటోయ్. 
ముచ్చటగా మూడు తరాలు,  మురిపాలు పంచుకుంటున్న గృహాలు. 
*********
లంచం
నన్నడ్డుపెట్టుకుని నా జీవితారంభాని కన్నా ముందే 
తన ప్రాభవాన్ని చూపగలిగేది,
అంతం తర్వాత కూడా తన ఉనికి  చాటేది
ఏదైనా ఉన్నదంటే అది లంచమేనోయ్ నా దేశాన. 
********

Friday, June 7, 2013

కష్టార్జితపు మత్తు

కష్టార్జితపు మత్తు 
ఆమె పిల్లల ఆకలి మంటల్లో 
ఆతని కష్టార్జితపు మత్తు 
చమురు పోస్తుంది. 
******
మౌనపు విత్తులు 
నీ పెదవులపై ఫలించిన మౌనాన్ని
విత్తులుగా చల్లుతూ, నా మనసున 
ఓ ఉద్యానాన్ని పూయిస్తున్నాయి  
నీ చూపులు. 
********
అనుభూతులు 
 పరిగెత్తే లోకాన అనుభూతులకు 
పెట్టుబడిగా పెట్టగలిగినంత కాలం నా దగ్గర లేదు. 
అందుకే నాకు నేను కూడా అనుభవానికి రావడం లేదు మరి. 
*******
కన్నీళ్లు 
విడిచిన ప్రతి సారీ 
గమ్యాన్ని చేరడం తెలిస్తే!
జీవితాంతమూ పోషించే వారెవ్వరూ చెప్పు ఈ కన్నీళ్లను. 
*********

Thursday, June 6, 2013

దొమ్మరిపిల్ల

దొమ్మరిపిల్ల
కూర్చుని అనుభవించే దొరసానితనం తనకొద్దంటూ 
అలుపూ సొలుపెరుగక క్షణమైనా విరామమడగక 
విశ్వపు వీధుల దొమ్మరిపిల్లలా తిరుగుతుంది 
నా మనసు. 
**********
వెన్నెల వాల్జడ 
నిండు పున్నమి రోజున జారుతున్న జలపాతాన్ని,
వెన్నెలవాల్జడగా చూపుతూ 
నా చూపులను పూలుగా ముడుచుకుందా కొండ. 
********
ఆడపిండాలు 
బ్రతికే వయసే ఇంకా రాలేదుగానీ 
చావడానికి తొమ్మిది నెలలు నిండాలా అంటూ 
మౌనంగా అడుగుతున్నాయి ఆడ పిండాలు కొన్ని. 
*********
గ్రంథాలయాలు 
లోకమొద్దనుకున్న నీతి నియమాలను 
తవ్వి తలకెత్తుకున్న వేదనతో 
మూలుగుతున్నయా పుస్తకాలు 
ఈ గ్రంథాలయాలలో. 
*********
 
 

Sunday, June 2, 2013

వీడ్కోలు

వీడ్కోలు
మౌనాలు కమ్ముకొస్తున్నాయి
ఇక సెలవంటూ అనుభవాలు జ్ఞాపకాలుగా పరిణమిస్తున్నాయి
కాలపు కథ సరే! మామూలే నేస్తం
దూరం చేయడానికే దగ్గర చేస్తుందేమో
ఇక ఇపుడు మనసుపై మరపు పొరలు కప్పాల్సిందే
ఎన్నో గలగలలు కిలకిలలు
మరపు రాని జ్ఞాపకాల దొంతరలనిక
కన్నీటి తెరల వెనుక పొదగాల్సిందే
కోపాలు, కలహాలు, సరదాలు మౌనంగా ఇక విశ్రమించాల్సిందే
అవును! నిజం నాకు నిశ్చయంగా తెలుసు
అందుకే ఈ కలయిక శాశ్వతమనుకునే సాహసం ఎన్నడూ చేయలేదు
కానీ ఇదేమిటో నేస్తం నీ వియోగం నన్ను వేధిస్తోంది
ఇప్పుడు నన్ను సమాధానపరచే వారెవ్వరు నేస్తం
ఘనమైన నీ జ్ఞాపకాలు తప్ప.
***********
జీవితం
ఇంతకన్నా అందమైంది ఏదీ లేదు 
ఇంతకన్నా అందమైనవే అన్నీను 
అనే రెండు మాటల నడుమ 
తన పరిధిని విస్తరించుకున్నదే జీవితం! 
*******

Wednesday, May 29, 2013

నా మనసు

నా మనసు 
లోకాన్ని ఒవైపుకు, నన్నోవైపుకు నెట్టేస్తూ 
బలవంతానా ఓ విభజన రేఖను గీసిందెందుకో నా మనసు 
పోనీ! లోకం వైపు ఓ అడుగేద్దాం, దాని అంతరంగాన్ని చదివేద్దాం అనుకుంటే 
నీదే నిజమంటూ ఎక్కడలేని రాజసాన్ని నాకాపాదిస్తుంది 
నా కనుసన్నల్లో మెలగాల్సిన కన్నెపిల్ల ఈ లోకమని నన్నొప్పిస్తుంది 
తెలుసు! నన్ను చూసి పరిహసిస్తుంది ఈ లోకమని 
తన తో పల్లవించని నాకై ఏ గాంధర్వాలనూ వినిపించదనీ తెలుసు 
ఐనా ఎందుకో ఆ విభజనరేఖను దాటలేను నేను 
నాకు అహమనుకో లేక  నాపై నాకే అభిమానమనుకో, ఏమైనా అనుకో నువ్ 
గాయాన్నైనా గేయంలా మలచే మనసు నాకుందని మాత్రమే అనగలను నేను. 
**********

Thursday, May 9, 2013

తొలకరి తూటాలు

తొలకరి తూటాలు 
గాలి వాటాన తనపై దుమ్మెత్తి పోస్తున్న 
ఆ బీడు పైకి! గురిపెట్టి మరీ తొలకరి తూటాలను పేల్చిందా ఆకాశం. 
ఆహా! యుద్ధమూ లాభాసాటేనోయ్ అప్పుడప్పుడు. 
********
మరణం 
ఇంతకాలము నే తోడున్నానన్న 
స్వాంతనతో విరబూసిన కాలానికి,
మాయని గాయం! నా మరణం. 
*******
మజిలీ 
మజిలీని నీ మనసు 
మరచింది గనుకే 
బిజిలీ పోయింది జీవితాల్లోంచి. 
*******
కాలం 
చేయి తిరిగిన వైద్యుడవు 
నీవని అనిపించుకోవడానికి 
నాపై ఇన్ని గాయాలు పూయించాలా నీవు?
ఓ కాలమా!
********