తెలుగు తల్లి భారతం
చరిత్రన ఆమె రాల్చిన ఆనందబాష్పాలనొక్క కడవన
వర్తమానాన ఆమె కార్చుతున్న కన్నీళ్ళ నింకొక కడవన
నింపుకున్న కావడినెత్తుకుని కాటి దారిన
బయల్దేరిందామె!
సోయగం నిండా పదహారు అణాలున్న
ఆమె మనసు నిండా ఏవో గాయాలు
గొంతున విషాద గేయాలు
ఎవరు తల్లీ నీవు ఈ దారి పట్టి ఇట్లా పోతున్నావు అని అడిగాను
వణికే గొంతుతో తన విషాదాన్ని
భారతంగా చెప్పనారంభించింది.
భువనవిజయ చంద్రికల నల్లుతూ
నింగి దాకా ఎగిరిన తన కీర్తి బావుటాపై
మరకలుగా పడిన, మన వ్యామోహాలను
తూర్పారబడుతూ ముగించింది.
ఇప్పుడు ఆమె ఎవ్వరో అర్ధమై అందరికీ వినబడేలా అరిచాను
అదిగో కాటి దారి పట్టి పోతున్న ఆమె మన తెలుగు తల్లని
ఆపండి ఆమెనాపండి అని
నీ గత వైభోగాన్ని తిరిగి నీ పాల్జేస్తామమ్మ అని
బాస చేసి ఆమె నూరడించండని
ఆమె గోడులానే నా గొంతు కూడా
అడవి గాచిన వెన్నెలేం కాదుగా! చెప్పవూ నేస్తం!
********
No comments:
Post a Comment