గానవాహిని

 గానవాహిని 

పికమాపిన గానాన్ని ఆ సెలయేరు 

ఆ యేరొదిలిన  పదాన్ని 

ఈ ఆకులనుండి జారే మంచుబిందువులు 

ఆలపిస్తుంటే 

ఇక తన గానవాహినికి అంతమెక్కడిదని  

అడుగుతుందా అడవి.

********

మెరుపు తీగ 

ఆ వీణతీగ కన్నా అందంగా ఉంది కదా 

మీటితే ఇంకెంత వీనులవిందైన 

సంగీతం వినిపిస్తుందో అనుకుంటే 

ఇలా ఉరిమిందేమిటా మెరుపుతీగంటూ 

కరుగుతున్నాయా మేఘాలు.

*********

వర్ణ విక్రయశాల 

ఏ దారినీ పూలన్నీ పోయి ఆకాశంలోని 

ఆ వర్ణ విక్రయశాలలోని రంగులను 

కొనుక్కొచ్చాయో ఆ దారినే పోయి 

అన్ని స్వప్నాలను కొనుక్కొచ్చింది 

నా మనసు.

********

శృతి 

కరిగిన ఆ ఇల్లాలి కలలు 

కన్నీళ్ళై కారుతున్నా నిషా మత్తులో పడి 

మేలుకోడా మొగుడు 

కానీ ఆమె ఒడిలోని బిడ్డడో!

ఆమె కన్నీళ్ళకో శృతినీయడా?

*********