శ్యామలధ్వజం

శ్యామలధ్వజం

శ్యామలధ్వజాన్ని 

పైకెత్తాయా చేలో 

చేయి చేయి పట్టి ఆ వానచినుకులు. 

*******

కొబ్బరాకు

వెన్నెల పట్టాభిషేకం చేసిన 

నా పెరటి తోటకు 

మకుటమై తానమరిందా కొబ్బరాకు ఛాయ. 

*******

లోటు

ఆమె మోస్తున్న కడవలోకి తొంగి చూస్తూ 

తనకు కాళ్ళు లేని లోటును 

పూడ్చుకుందా ఆకాశం. 

********

ముఖాముఖి

అదేమిటో! మాటలు సాగవు 

మౌనాలు మిగలవు 

నేను నా మనసు ముఖాముఖి ఎదురుపడినపుడు. 

********

ఎవరో!

ఆదమరచి  హాయిగా నిదరోతున్న 

ఆ తోటలోని అందాలపై అన్ని ముత్యాలు చల్లి

తెల్లారకుండానే నిద్ర లేపిందెవరో!

*********