వసంత శోభ

కాలాన్ని అరువిచ్చి పుచ్చుకుంటూ 

ఆ రుతువులు తనకు మాత్రం 

తరగని వసంత శోభను కట్టిపెడుతున్నాయంటూ 

మురిసిపోతోందా మృత్యువు.

******

అంత తొందరగా 

చెట్టు నీడను వదిలిపెడుతుందా 

బంధం బలమైనదైతే 

స్వేచ్ఛతో  పనేమిటంటూ 

ఆ ఎండుటాకు.

*******

బద్ద శత్రువులైన 

ఇద్దరు సమవుజ్జీల నడుమ 

అధికార బదలాయింపును 

ఎంత సులువుగా చేస్తుందా సంధ్య.

*******

అధికారంలోకి రాగానే 

ఇచ్చిన హామీని 

ఎంతందంగా నెరవేరుస్తుందో 

చూడా దీపం.

*******