నా మనసు

నా మనసు 

లోకాన్ని ఒవైపుకు, నన్నోవైపుకు నెట్టేస్తూ 

బలవంతానా ఓ విభజన రేఖను గీసిందెందుకో నా మనసు 

పోనీ! లోకం వైపు ఓ అడుగేద్దాం, దాని అంతరంగాన్ని చదివేద్దాం అనుకుంటే 

నీదే నిజమంటూ ఎక్కడలేని రాజసాన్ని నాకాపాదిస్తుంది 

నా కనుసన్నల్లో మెలగాల్సిన కన్నెపిల్ల ఈ లోకమని నన్నొప్పిస్తుంది 

తెలుసు! నన్ను చూసి పరిహసిస్తుంది ఈ లోకమని 

తన తో పల్లవించని నాకై ఏ గాంధర్వాలనూ వినిపించదనీ తెలుసు 

ఐనా ఎందుకో ఆ విభజనరేఖను దాటలేను నేను 

నాకు అహమనుకో లేక  నాపై నాకే అభిమానమనుకో, ఏమైనా అనుకో నువ్ 

గాయాన్నైనా గేయంలా మలచే మనసు నాకుందని మాత్రమే అనగలను నేను. 

**********