జలపాతం

జలపాతం 

వానచినుకిచ్చిన హాయిని 

మరువలేకే కాబోలా కొండ 

ఆ జలపాతాన్ని అలా సాగనంపి 

తుషారాన్ని మీదకొంపుకునేది.

*******

కాలిబాట  

చూపినట్టే చూపి చిటికెలో 

ఆ కాలిబాటనెలా మాయం చేసిందో చూడు 

మేఘాల మధ్య ఆ మెరుపుతీగ.

********

  మహావృక్షం  

వేరు కాండము ఉండి 

పత్రాలనేవే లేకుండా 

ఇంత ఒత్తుగా నా గదినిలా కప్పిన 

ఈ దీపపు మహావృక్షాన్ని 

ఆకులన్నీ కన్నులు చేసుకుని 

విస్తుపోయి చూస్తోందా మాను.

*******

పనిపసోడు  

రోజుకెన్ని సార్లో ఆ ముత్యాల పంట 

కాపుకొచ్చి రాలుతుంది 

ఈ పనిపసోడి ఒంటి మీదుగా 

కనీసం ఆ  పంటకైనా  

గిట్టుబాటు ధర ఇవ్వదెందుకోయ్ ఈ లోకం.

*******