కారు మేఘాలు

కారు మేఘాలు 

మౌనం తప్ప ఇంకో భాష తెలీదన్నట్లు 

ఎదురు బదురు చూసుకుంటూనే 

రోజులు గడిపేస్తున్న ఆ నింగి నేలలను 

కలిపే బాధ్యత భుజాన వేసుకుని 

కరిగిపోయాయా కారుమేఘాలు.

******

తామరాకు

నేలను 

తామరాకును చేసే 

నీటిబొట్టు నా నీడ.

******

తోరణం

నా ఏకాంతాన్ని పంచుకుంటూ

ఆ వెన్నెల ఇంకా ఇంకా వెలిగిపోతుంటే 

వలపు పేరంటపు తోరణాన్ని 

ఎంతందంగా కట్టిందో చూడా కలువ 

నా కనుదోయి వాకిట.

*******

ఏమనాలో ..

అది పాపిట రేఖో 

కంట హారమో 

వడ్డాణమో లేక

మురిసా ప్రియుడు పెట్టిన 

మువ్వల పట్టీయో చెప్పలేకున్నాను 

నీవైనా చెప్పవోయ్ 

ఆ కొండను చుట్టుకుని పారుతున్న 

ఈ నదీ పాయ నేమనాలో