తొలిసంధ్య

తొలిసంధ్య 

ఒక్క రాత్రిలోనే అలంకరణ శాస్త్రంలో 

తల పండిపోయేంత విజ్ఞానాన్ని 

ఎలా సాధించాయా పచ్చికలని 

అంతంత గొంతులేసుకుని 

తనపై విరుచుకుపడుతున్న 

ఆ పక్షులకేమి బదులీయాలో తెలియక 

పాపం అంతలోనే జారుకుంటుంది 

ఆ తొలిసంధ్య.

********

పరిణామం  

ఓ తరమాగాక దొరికిన తీరికేళ 

ఊయలూపే శయ్యగా 

తన బొజ్జను మలచి 

తన అనుభూతులను 

ఒక బోసినోరు ఇంకో బోసినోటితో కలసి 

నెమరేసే దృశ్యం తన గుండెలపై నుండి 

చెరిగిపోయేలా ఎందుకు పరిణమించావంటూ 

ఆ కాలాన్ని నిలదీస్తుందీ పుడమి.

**********

వయసుమళ్ళిన అనురాగాలు

ఎవరికంటా పడకుండా 

అంతర్వాహినులై పారి 

మరుభూమిలో కలిసే జీవనదులైనాయి 

ఆ వయసుమళ్ళిన అనురాగాలు.

*********