చుంబనం

చుంబనం 

తాకీ తాకని ప్రియుని చుంబనంతో 

ఆ ప్రేయసికి పట్టిన  స్వేదబిందువుల్లా లేవూ 

మేఘాల చుంబనంతో ఆ కొండపై 

ఆకు చివర్లనుండి జారుతున్న నీటిబిందువులు.

విందు 

కొండంత పీటేసుకు కూర్చుని 

గోదారంత విస్తట్లో 

నిండు జాబిలి వడ్డిస్తున్న 

విందారగిస్తోంది నా మనసు.

*******

మాటల సేతువు 

మాటల సేతువుపై ఎపుడో గానీ 

చేయి చేయి పట్టి 

నడవడం లేదా మనసు, నాలుకలు.

********

కాపురం 

ఊయలలో ఊగే బిడ్డను 

కందామని కాబోలు ఊయలూగుతూనే 

కాపురం చేస్తున్నారా కలువ, జాబిలులు

వారి కలలు అలలై ఊరు ఈ తటాకాన.

********