సాహసం

 సాహసం 

నా సాహసం నీ చెక్కిళ్ళను ఎరుపెక్కించిన వేళ 

వాటి పై ఇరు సంధ్యలను చూస్తూ

నీ కోపాన్ని సుర్యోదయంలా 

నీ హాసాన్ని చంద్రోదయంలా ఆస్వాదించాలన్న 

ఆ కడలి తలంపే నీ మెడను ముత్యమైనదే 

ఓ నా చెలీ!

*******

రాయి  

ఇంత సేపు ఏ గుండెల మాటున ఆపుకుందో గానీ 

తన లోని గాంధర్వగానాన్ని  

ఇంతసేపు ఏ పాదాల మాటున అణచుకుందో గానీ 

తనలోని ఈ నాట్య హేలను!

చూడా నిశ్చలమైన చెరువులో 

పాయల పసిపాపలనూయలలూపుతూ 

పాడుతున్న ఆ రాయి.

********

పున్నమి రాత్రి  

ఎక్కడీ పండు వెన్నెల్లో మత్తెక్కి 

ఆ ఉన్మాదంలో తమకు 

కన్నుగీటుతుందో ఈ చెరువని 

పాపం భయంతో 

దాక్కుంటున్నాయా తారలీ పున్నమిన.

*******

నీడ 

గొడుగుగా ఈ కొబ్బరిచెట్టు ఛాయను పట్టుకుని 

వామనుడై వచ్చి మూడు అడుగులీయమంటూ 

నా మనసుని అడిగి ఆకాశపు అంచులదాకా 

నా మనసుని ఎగురవేసింది చూడు నా నీడ.

***********