ఈ జాబుకు బదులేది?

ఈ జాబుకు బదులేది?

అందరి ఎదలోని  ఊహలు, పసిడిజిలుగుల పల్లకీనెక్కాలని 

అందరికీ అందేలా జాబు రాసి విడిచాడు వాడు 

నా కాలికింద నలిగే గడ్డిపోచ సైతం, 

నిలిచి గాలికూయలూగే చిగురాకు సైతం 

తనకందిన లేఖలో తడిచి తబ్బిబ్బయితే,

నిలబడలేని పనుల మునిగిన నాదు మనసునకు 

పట్టుబడలేదయ్యో! ఆ వెన్నెల పట్టాభిషేక ప్రాభవం. 

*********

పలకరింపు 

తొలకరి పేరు చెప్పి 

అందరినీ ఆ గాలిలా 

పలకరించడం నేర్చిందీ మట్టి. 

*********

ఆశ  

జరామరణాలనే 

అలలతో సింగారించుకున్న సంద్రమీ లోకమని 

మంచి ముత్యాలకై వెదికేవు 

నీ ఆశ పాడుగాను. 

*******

పతంగాలు  

మెరుపంటి దారం తెగి 

గాలి వాటున 

ఎటు పడితే అటు ఎగిరిపోయే 

పతంగాలీ మబ్బులు. 

*******