నా మనసు

నా మనసు 

లోకాన్ని ఒవైపుకు, నన్నోవైపుకు నెట్టేస్తూ 

బలవంతానా ఓ విభజన రేఖను గీసిందెందుకో నా మనసు 

పోనీ! లోకం వైపు ఓ అడుగేద్దాం, దాని అంతరంగాన్ని చదివేద్దాం అనుకుంటే 

నీదే నిజమంటూ ఎక్కడలేని రాజసాన్ని నాకాపాదిస్తుంది 

నా కనుసన్నల్లో మెలగాల్సిన కన్నెపిల్ల ఈ లోకమని నన్నొప్పిస్తుంది 

తెలుసు! నన్ను చూసి పరిహసిస్తుంది ఈ లోకమని 

తన తో పల్లవించని నాకై ఏ గాంధర్వాలనూ వినిపించదనీ తెలుసు 

ఐనా ఎందుకో ఆ విభజనరేఖను దాటలేను నేను 

నాకు అహమనుకో లేక  నాపై నాకే అభిమానమనుకో, ఏమైనా అనుకో నువ్ 

గాయాన్నైనా గేయంలా మలచే మనసు నాకుందని మాత్రమే అనగలను నేను. 

**********

తొలకరి తూటాలు

తొలకరి తూటాలు 

గాలి వాటాన తనపై దుమ్మెత్తి పోస్తున్న 

ఆ బీడు పైకి! గురిపెట్టి మరీ తొలకరి తూటాలను పేల్చిందా ఆకాశం. 

ఆహా! యుద్ధమూ లాభాసాటేనోయ్ అప్పుడప్పుడు. 

********

మరణం 

ఇంతకాలము నే తోడున్నానన్న 

స్వాంతనతో విరబూసిన కాలానికి,

మాయని గాయం! నా మరణం. 

*******

మజిలీ 

మజిలీని నీ మనసు 

మరచింది గనుకే 

బిజిలీ పోయింది జీవితాల్లోంచి. 

*******

కాలం 

చేయి తిరిగిన వైద్యుడవు 

నీవని అనిపించుకోవడానికి 

నాపై ఇన్ని గాయాలు పూయించాలా నీవు?

ఓ కాలమా!

********

వెన్నెల

వెన్నెల 

అలంకరించుకోవడం 

నేర్చిన చీకటే 

వెన్నెల. 

*****

నీడ 

బ్రతకడానికని కాలంతో పాటూ 

పరుగెడుతున్న నన్ను చూసి 

ఆయాసపడుతుంది నా నీడ.  

అవును! నా కన్నా నా బ్రతుకు విలువ 

దానికే తెలుసు మరి. 

*******

 కాట్వాక్ 

కొన్ని దాంపత్యాలు కూడా 

ఫాషన్ గా కాట్వాక్ చేస్తున్నాయి 

కోర్టు మెట్లపై. 

*******

పరిమళం 

మనసుతో ఆ దేవుణ్ణి వెదకాలని 

తనువు శిలపై వాల్చి 

గుడిని దాటిందా పరిమళం. 

*******

పానుపు

ఇటుగా వచ్చిన వేళ 

ఆమె పాదాలను తాకవచ్చని కాబోలు 

ఆ గడ్డిపూలన్నీ ఆమె దారిలో పానుపైనాయి. 

*******

గోదారి 

ఓ నాడు ఆకాశపు కన్య తారల ముందు నర్తిస్తుంటే 

ఆమె పైట జారి వెన్నెల సంద్రాన పడి తడిచిందట 

కన్నె ఆ పైట తీయబోవ వెన్నెల సంద్రం కసరి 

ఆ పైటను నేలకు విసిరిందట 

ఆకాశపు గానం తనలో కలుపుకుని గలగలా సాగిందా పైట 

గోదారిలా వెన్నెలంటిన కస్తూరిలా. 

********

మిణుగురులు 

తానో నాడు జాబిలో చేయిపెట్టి గుప్పెడు వెన్నెలను 

బయటకు తీసింది, గాభారాపడి నేను ఇదేమిటని అడిగా 

తను నవ్వుతూ ఆ గుప్పిటపై నా చేతిని పెట్టి  

 ఈ వెన్నెలతో మన ప్రేమదీపాలు వెలిగి చీకటి రాత్రులలో కూడా 

లోకం మన ప్రేమను గాంచుగాక అంది 

అంతే లెక్కకు మించిన మిణుగురులు. 

*********

అరువు 

నీ మెరుపు మేనియ చూడాలని 

ఆకాశం నా కళ్ళను 

ఓ నిముషం పాటు అరువడిగింది. 

********

ముక్కుపుడక

ముక్కుపుడక 

తావిని మోయలేకా గాలికి పట్టిన 

స్వేదబిందువొకటి జారి 

ఆ పువ్వుకు ముక్కుపుడకైంది  అదిగో అలా .... 

*******

ప్రకృతి 

జీవిత ప్రాంగణంలో 

మనిషి వేగంగా పరుగెత్తడం 

మొదలెట్టిన చోటే ఆగిపోయింది 

అసలు ప్రకృతి. 

********

తోడు 

సుఖదుఃఖాలను  చెప్పుకోవడానికి 

ఆ రాదారికి కూడా 

కుడిఎడమల మానులున్నాయి 

కానీ బ్రతుకు రాదారిపై నీకో ....?

********

మగత 

తానెవరిని మత్తెక్కించాలని 

మగతగా అడుగుతుందా నిద్ర 

పబ్బుల వెంట తిరుగుతూ. 

********

మేజువాణి

మేజువాణి 

నవ్వే నీ పెదవికి తెలుసు 

నిన్నెంతలా కవ్వించిందో నా మనసని 

మోడును కానంటూ విరబూసిన నా హృదయానికి తెలుసు 

నాలోని మౌనాలను పాటలుగా ఎలా వసంతించిందో నీ మనసని 
  అలలెగసి పడే సంద్రంలా 

నీ ఆలోచనలతో నిండిన నాదు అంతరంగానికి తెలుసు 

నీవు కాని అనుభూతి నా అనుభవానికి రాదనీ, నా మనసుకు అవధి వీవని 
మబ్బుల తేరులపై ఆగుతూ సాగుతున్న నా చూపులకు తెలుసు  
 గగనమంతటి నీ వలపు తోటన తేటులై తామాడే ఆటన 
హరివిల్లులెన్ని విరిశాయో, విరజాజులెన్ని కురిశాయో! పుడమిన అణువణువునూ పలకరించే కిరణాలకు తెలుసు 

నీ, నా సంగమ సంకేత నికేతనం 

ఎగురనిచోటు యుగాలు మారినా వాటికి కానరాదని 

ఆగక సాగుతూనే ఉంటుంది మన మానసవీణల మేజువాణి అని

. **********

మనసుఆకలి

మనసుఆకలి 

చెరువంత విస్తరిలో 

కొసరి కొసరి వెన్నెల వడ్డించే ఆ జాబిలింట 

విందందుకున్నావేమిటోయ్ ఎపుడైనా 

అన్నానని కాదుగానీ అప్పుడప్పుడూ మనసు ఆకలి కూడా తీర్చాలోయ్ 

ఏమంటావ్?

*******

ఏకాంతశిల్పి 

నన్నానందింపజేయడానికి నా ఏకాంత శిల్పి 

నిన్ను చెక్కి నా మనసు నింపి 

తానెక్కడికో వెళ్ళిపోయాడు. 

********

పిలవని పేరంటం 

తలుపులన్నీ మూసేసినా 

పిలవని పేరంటానికి 

ఎంత దర్జాగా వచ్చిందో చూడా చీకటి. 

******

మెరుపు సుందరి  

చీకటిలోనూ ఆ మబ్బుల గుంపుల్లో 

దారి చేసుకుంటూ ఎక్కడికి పోతోందో 

ఆ మెరుపుసుందరి. 

******