హస్తభూషణం

హస్తభూషణం

పుస్తకం హస్తభూషణమని అన్నందుకు 

నన్ను చెరసాలలో పెట్టాలంటోంది 

నా చరవాణి. 

******

విలువలు

గోడలు దాటి విజ్ఞానం బయటకు రానపుడు 

గుండెలు దాటి లోనికెలా పోతాయోయ్

విలువలు. 

******

బలం

నమ్మడానికి 

ఇంత తేలికపాటి మనుషులు దొరికే ఈ దేశాన

అబద్ధాలకు వేయిటన్నుల బలమెందుకు?

******

గస్తీ 

ఆడది... అర్ధరాతిరి.... స్వేచ్ఛ.... 

అని ఆనాడు ఆ మహాత్ముడు అన్న మాటను 

నిజం చేయడానికి, కర్ర చేతపట్టి 

గల్లీగల్లీ లోను గస్తీ తిరగాలేమో 

ఇపుడా గాంధీ విగ్రహాలు

*******

ఉల్లి

ఉల్లి

కొస్తే కాదు చూస్తుంటేనే 

చూస్తుంటేనే కాదు అంటుంటేనే

అంటుంటేనే కాదు వింటుంటేనే!

ఎన్ని దారులో చూశావా 

నా కంట నీరు తెప్పించడానికా ఉల్లికి. 

********

దారిద్ర్యం 

దారిద్ర్యమే పట్టకపోతే!

అంతటి వైభోగమెక్కడిదా నటికి 

అదేనోయ్ వస్త్ర దారిద్ర్యం. 

*******

దృశ్యకావ్యం 

గట్టుమీది కొబ్బరాకును కలంగా పట్టి,

ఈ చెరువు నీటిని సిరాగా పోసి 

నే రాసిన దృశ్యకావ్యాన్ని!

వీక్షిస్తూ మురిసిపోయే మనసులెన్నో 

ఈ పున్నమిరాతిరిన

********

పరిమళం  

తొలకరిన ఆకులను పూయించిన 

ఆ వాన చినుకులను!

ఏవి ఆ పూలపరిమళాలని అడిగానో లేదో!

నా మనసుని పల్లవిస్తూ తాను కరిగిందా మన్ను. 

********

మృగతనం

మృగతనం

లేత అద్దాల చెక్కిళ్ళలో 

అప్పుడప్పుడు, అక్కడక్కడ మృగాలు కొన్ని 

మగతనం చూసుకుంటున్నాయి 

*******

కాలం చెల్లిన ఆభరణాలు

ఆటపాటలనే కాలం చెల్లిన ఆభరణాలు 

తనకొద్దంటూ, ఎంత కళావిహీనంగా 

పరుగు పెట్టేస్తోందో చూడీ బాల్యపు విజ్ఞానం 

********

కరుణించే  మనసు

విసురుగా కురిసే వాన చినుకులకు 

పుడమిని చీల్చే పదునెక్కడిది,

కరిగి కరుణించాలనే వెన్నలాటి మనసు 

ఈ మన్నుకు లేకుంటే. 

*******

అహం

ఎక్కడలేని గౌరవాన్ని 

నీకు తెస్తానన్న ముసుగులో,

నీకు నిన్ను దూరం చేసేదే అహం. 

*******

జోలపాట

జోలపాట

నడిరోడ్డుపై, కాసింత కారుణ్యానికై

వేదనతో జోలె పడుతున్న తల్లి
ఆక్రందనలో పడి,కొట్టుకుపోతున్న జోలపాటనెలా పట్టుకుని
నిద్దరోతోందో ఆ ఒడిలోని శిశువు.

*******

ఐకమత్యం

నేటి కాలాన

ఐకమత్యం సాధించే

నిష్ఫలమేమిటో చెప్పనా!

పూలన్నీ దండగా మారి,

దండగమారి నేతల పాల్బడడమే.
********

మానవత

అన్ని కన్నీళ్ళను చల్లినంత మాత్రాన

సొమ్మసిల్లి పడిపోయినా మానవత

లేస్తుందా? చెప్పు.
*******

అద్దం

కదలకుండా నిలబెట్టి

నన్ను నిలువుదోపిడి చేస్తూనే!

తనపై నవ్వుల పూలు వేయించుకునే

కళనెక్కడ నేర్చిందో ఈ అద్దం.
*******

ఉరికొయ్యలు

ఉరికొయ్యలు

ఆడది నిర్భయంగా తిరగాలంటే 

ఉరికొయ్యలకు తలలు పూయాల్సిన ఖర్మ 

ఇంకెన్నళ్లో నా భారతాన. 

******

చందమామ

చూపుల పాలనకెంత దూరమైందో 

నింగిలోని ఆ నిండు చందమామ 

లేత చేతుల లాలనకు అంతే దూరమైంది 

ఈ కథల చందమామ. 

*******

పూనకం

గుడిలో అజ్ఞానమనిపించుకుని 

పబ్బులో విజ్ఞానమనిపించుకునేదే!

పూనకం. 

*******

ప్లాట్ 

పొలం కట్టిన 

పచ్చని చీరను 

పచ్చనోట్లు విప్పేస్తున్నాయి. 

*******

జాబిలి -కలువ

జాబిలి -కలువ

నీ చెక్కిలిపై విలాసంగా నవ్వుతున్న 

నన్ను నేను చూడకనే 

కలువలై విచ్చిన నీదు కన్నుల జూచి!

ఎక్కడా? ఆ నిండు జాబిలని వెతికాను. 

*******

కొంటె కోణంగి

కవ్వించి, కవ్వించి నింగి వెలుగులను దాచేసే 

ఆ కొంటె కోణంగేనా! 

కరిగి, కొసరి కొసరి ఇన్ని అందాలను 

దానమిచ్చేదీ అవనికి. 

*******

గుణపాఠం

ఎదురు లేదంటూ చెలరేగే గాలికి, 

వెదురు తగిలి నేర్పే గుణపాఠం 

ఈ జన్మకు మరువగలవా నువ్వు. 

*******

చిరంజీవులు

పూస్తున్న ఉరికొయ్యల సాక్షిగా,

నా దేశాన! ఆడదాని భయము,

మగవాడి అహంకారము రెండూ చిరంజీవులే.

 *********

నాగరికత

నాగరికత

అవమానం అనుకోపోతే 

నాగరికతకు నేటి ప్రమాణమేమిటో చెప్పనా!

నడిరోడ్డుపై పోతున్న మానమే. 

******

వానచినుకులు

బాటసారులై 

గగనపు వీధుల సంచరించే 

కారుమబ్బులకు పట్టిన 

చెమట చుక్కలేమో ఈ వానచినుకులు.

ప్రజ్ఞలు 

వెలుగులోకొచ్చే స్థోమత లేక 

కొన్ని ప్రజ్ఞలు, ఎంత చీకట్లు మిగిల్చాయో 

నా భారతాన. 

******

ఆత్మహత్య

కావాలని చమురొంపుకుంటున్నాయి 

కొన్ని దీపాలంటూ 

ఉసూరుమంటున్నాయి 

రేపటి వెలుగులు. 

******