తాంబూలం

తాంబూలం 

ఆమె చేతులను చిగురింప జేసి
ఆతను! నాకేది ఆ వర్ణమని
అడిగాడు కాబోలు
తాంబూల మేసుకొచ్చిందామే
*******

వస్తుందా?

అర్ధ రాతిరి ఆడది ఒంటరిగా తిరిగే 

రోజొస్తుందేమో గాని,

ఆ కధా నాయికి ఒంటి నిండా 

గుడ్డ కప్పుకునే రోజు ..... ?

******** 

విరిసిన పూలై 

రాతిరంతా నాతో 

ముచ్చటలాడిన తారలన్ని 

తెల్లారిందో లేదో 

కిటికీలోంచి నన్ను చూస్తున్నాయి 

విరిసిన పూలై 

******

DVD

అనుబంధాల బరువును 

దింపుకుంటుంది నా గుండె 

DVD గా 

********

కసరత్తు

కసరత్తు 

నా చూపులను గెలవాలని
అలా అలా కసరత్తు
చేస్తున్నాయా కిరణాలు
ఈ అలలపై
*******

సగం సగం

ఇంటి దాని కన్నీళ్ళు  సగం
ఒంటి నుండి జారిన  చెమట నీళ్ళు సగం
చాలవేమిటోయ్ నింపడానికా
ఖాళీ మద్యం సీసాని

తొలకరి 

తెల్లారుతూనే ఆకాశం పైకి
తొలకరిని కురిపిస్తుందా వనం
కిల కిల మంటూ

నా కళ్ళు 

వికసిస్తున్న నీ వదనపు పరిమళాన్ని
శ్వాసిస్తున్నాయి నా కళ్ళు
 

గోరుముద్దలు

గోరుముద్దలు 

నిద్దురా మెలకువ కూడా

గోరుముద్దలే

ఒత్తిడికి

*******

గురు దక్షిణ 

నాట్యం నేర్పిన గురువని!

ఆ గాలికి

పూలు పత్రాలను రాల్చి

గురుధక్షిణ లిస్తుంటాయి

ఆ చెట్ట్లు 

******

మచ్చలోడు 

అందగాడని అందరూ అంటూనే ఉన్నా 

మాటి మాటికి  ఆ మబ్బుల మాటుకెల్లి 

ముఖం కడుకొస్తాడేమిటా మచ్చలోడు 

******

బుగ్గన చుక్క 

అద్దంలోని చందమామకు 

బుగ్గన చుక్క పెట్టానని 

నాకు వినబడేలా  పక్కున నవ్వింది 

ఆ కలువ 

 

 

 

ఆగని కన్నీరుగా

ఆగని కన్నీరుగా 

ఆకాశం కూడా
నా మనసులానే
మబ్బులతో డాగులు పడింది
పెద్ద వర్షం రావలసిందే
ఆగని కన్నీరులా

****

సతీ సహగమనం

సతీ సహగమనమంటే
ఎమిటని ఆ కలువ కమలాల కన్నా
మిన్నగ చెప్పగలవారేవ్వరోయే!
****

పిసినారి సంద్రం 

అంత చోటు తనకున్నా
నా కాళ్ళ  కింది చోటును కూడా
ఎలా కరిగించుకుని పోతుందో చూడా సంద్రం
****

మిడిసిపాటు

మెరిసిపడే  వెన్నెలకు 

మిడిసిపడడం నేర్పింది 

మా పల్లె చెరువు 

 

 

బదులు 

వయ్యారముప్పొంగే పరువంపు వేళ
ఆ దరి కెన్ని ముద్దులిడినావని
ఎడబాసిన వేళ ఈ గోదారి నడిగితే
తిన్నెలుగా పరుచుకున్న
ఈ ఇసుక రేణువు లన్ని,అని
ఎంత అందంగా బదులిచ్చిందో చూడు

పేరంటాళ్ళు 

పగలూ రాత్రీ ఎప్పుడూ
ఎవేవో పిలుపులతో
ఇన్నిన్ని పేరంటాళ్ళను
ఎలా జరిపిస్తుందీ వనమని
ఆ చిటారు కొమ్మనో ఈ చిన్ని మొగ్గనో
అడిగావా ఎపుడైనా నువ్వు?

మెరుపు

నింగి తోపున పూచిన 

పూలా మబ్బులను కూర్చి 

మాల కడదామనుకున్న నా తలపుకు 

చిక్కెనుగా మెరుపు దారమై  

ఉగ్రవాదం

ఉగ్రవాదం

ఇంకెన్ని కన్న పేగులను!

మెలిపెట్టి మోపుగా పేని బంధించాలో!

మదపుటేనుగంటి ఉగ్రవాదాన్ని. 

*****

గాయాలకు పుట్టడం తెలుసు. 

ఘోరాలకు చావడం తెలీదని 

తరగతి గదులన్నిటి పై రాయాలని ఉందిప్పుడు. 

*****

పూవుల్లాంటి పిల్లల దేహాలపై!

పూలై రాలుతూ ఆ పుస్తకాలు పడిన నరక యాతనను వర్ణించ 

ఎన్ని గ్రంధాలు రాయాలో అని 

అంటున్నాయా తరగతి గదులు. 

*****

మనిషిగా మారమని చెప్పాలా మృతదేహాలు 

అవీ మొగ్గలవి. 

*****

బాంబులు, గుళ్ళనే పొరలను తవ్వుతూ 

మనిషన్న వాడి ఆనవాళ్ళను కనిపెట్టాల్సి వస్తుందేమో 

ఆ దేవునికైనా. 

******

వింత సృష్టి

వింత సృష్టి 

మనసులేని విజ్ఞానం 

నలుమూలలా విజ్ఞానులను పోగుచేసి 

ఓ వింత సృష్టి చేయమందట 

కర్ణుడు కవచకుండలాలతో పుట్టినట్లే 

ఇకపై పుట్టే ప్రతి శిశువు 

లాప్టాపులతో బుక్స్ బాగులతో పుట్టాలని 

క్యార్ క్యార్ మనకుండా సర్ మేడం అనాలని 

ప్రయత్నిస్తామన్నారట విజ్ఞత లేని విజ్ఞానులు 

కాదు సాధించి తీరాల్సిందేనందట సమాజం 

వేలెత్తి చూపడం మాని ముక్కున వేలేసుకుందట మేథావితనం. 

*******