జ్ఞాపకాల పూలు

జ్ఞాపకాల పూలు

నాలుగు, జ్ఞాపకాలను పూలు లేనపుడు 

నలుగురూ మెచ్చే 

మధువెక్కడుంటుందోయ్! మదిలో 

*****

బరువు 

బరువే, 

బాధ్యత అయింది! పాపం

ఆ బాల్యానికి 

****

నవవధువు

నిత్యమూ బుగ్గ చుక్కతో భాసిల్లే 

నవవధువులాటి భాగ్యమబ్బిందా చీకటికి 

ఈ మిణుగురుల పుణ్యమా అని 

******

జటాయువు

సీతాపహరణ వేళ 

జటాయువు అయింది 

ఆంగ్లపు చేతుల నా సంస్కృతి చిక్కిన వేళ 

తెలుగు స్థితి 

*****

మనసు లోపల....

మనసు లోపల....

పుడమి గుండెల్లో,

కడలి లోతుల్లో ఏముందో 

ఇట్టే కనిపెట్టేసే మనిషి మనసు 

తన లోపల ఏముందో మాత్రం...... 

******

పలుకే....

పలుకే బంగారమాయెన అంటూ 

ఎంత బాగా భవిష్యత్తుని 

చూడగలిగారో ఆ త్యాగరాజు అని 

నాకిప్పటికి అర్ధమైందోయ్ 

ఆ కొత్త సినిమా పాటను వింటుంటే 

********

తొందర పడితే

వసంతం విరబూయించిన ఆ పూల సిరులు

రాతిరికా మిణుగురులకు విడిదైతే 

అమ్మో! అంత అందాన్ని చూడాలని 

ఆ సూరీడే తొందరపడితే ఎలా మరి 

*******

ఊహాచిత్రం

గాలి గీస్తున్న 

ఊహాచిత్రం 

ఆ ఎండుటాకు 

****

నీటి ముత్యాలు

నీటి ముత్యాలు

రాతిరంతా ఈ ధాత్రి చేసిన 

అతిథి మర్యాదకు మెచ్చి 

ఆ చీకటి జార్చిన ఆనందబాష్పాలే 

ఈ పచ్చికల తలపై నీటిముత్యాలయినాయి. 

******

సంతసం 

మెరిసినంత 

ఎంత సంతసమో నీకని అడిగేంతలో! 

కరిగి నన్ను చేరేంత అని 

బదులిస్తూ ఉరుముతుందా ఆకాశం. 

********

సరసాలాట

చిగురాకు చాటునొరిగి,

గాలి సయ్యాటన నాడే ఎరిగిన సరసాలాటను 

కన్నులారా గాంచి కాదా 

ఇప్పుడు నీ సిగన 

ఫక్కున నవ్వేదా మల్లె మొగ్గలో చెలీ. 

*******

జాతి కేతనం

జాతి కేతనం

సొమ్ములు మారే చీకట్లోన?

శీలం పోయే అంగట్లోన?

ఎక్కడ ఎగరాలోయ్ నేనని, అడుగుతుంటే జాతి కేతనం!

మౌనంగా నువ్ బదులిస్తావో!

మదన పడి మరి అమృతమిస్తావో?

********

కీచురాయి 

చీకటిన ఈ ధాత్రికి ధైర్యం చెప్పే 

కీచురాయి పాటైనా చేయరేమీ లోకులు 

ఎదలో చీకటులు అలముకున్నేళ. 

*******

కడలి

ముంగిట నవ్వులతో 

రంగవల్లికలేయు అలలున్న 

ఆ కడలింట లక్ష్మి కొలువుండ

ఆశ్చర్యమేమిటోయ్

******

వెన్నెల కవిత

పున్నమి వెన్నెల చెబుతున్న 

కమ్మని కవితల భావాన్ని 

నేల పుటల నెలా రాస్తున్నాయో చూడు 

ఆ అడవి మానులు తమ నీడలను కలాలు చేతబూని

*******

 

కుటుంబం

కుటుంబం

గోడకు వేలాడే పటంలోని 

నలుగురు ఏరంటే!

ప్రపంచపటం లో చూపుతూ 

గొప్పలు పోయే కుటుంబాలెన్నో! నా భారతాన. 

*******

చందమామలు 

భేతాళ కథలు వింటూ 

కాలం గడపాల్సిన చందమామలు 

భుజానేవో మోసుకుంటూ 

కాలంతో పరుగెడుతున్నాయి. 

*******

మద్యం సీసా

ఒంటి నుండి, కంటి నుండి 

జారే బొట్టుబొట్టు ను తనలోకి జార్చుకుంటూ 

భలేగా గుప్పుగుప్పుమంటుందిలే 

ఆ మద్యం సీసా. 

*******

ఇంద్రచాపం

ఒకరి మనసులోకొకరు తొంగిచూసే ఇంద్రజాలం!

 మాలా మీ అందరికబ్బితే 

ఎన్ని ఇంద్రచాపాలీ లోకాన అని అంటున్నాయోయ్ 

ముక్త కంఠాన ఆ ఎండావానలు . 

********

చెలీ!

చెలీ!

మింటిలోని ప్రతి తారలోను 

నీ రూపునూహించినాను.

నల్లబడి నిండు జాబిలి 
మన పెళ్లి వేళ 
నీ బుగ్గన చుక్కౌతానన్నది! ఓ చెలీ!
*******
నీ వాలుచూపులు నాకై రాసిచ్చిన 
వీలునామాను చదువుకునే వేళ!
అంత వణుకెందుకే చెలీ 
నీ పెదవులకు 
*******
గుప్పెడు మల్లెలకు వరమిచ్చి 
గంపెడు శరాలను ఎక్కుపెట్టి 
అడుగైనా కదపలేని తనాన్ని 
బహుమతిగా ఇచ్చావేమి
నా మనసుకో చెలీ!
*******
పండు వెన్నెల్లో 
ఆ కలువను మించి విరిసిన 
నీ ముఖకమలాన్ని చూస్తున్న నిండు జాబిలిని 
కాస్త నిదానించమన్నాను ఓ చెలీ!
********

అహం!

అహం!

అహం! నా కంటి రెప్పేయనపుడు 

చూపుల నుండి ఎన్ని అందాలను 

తప్పించేసిందీ కాలమన్నది 

నలుగురిలోనూ చెల్లని నాణెమైనప్పుడు గానీ 

తెలీలేదు నాకు 

ఐనా తెలివిన పడక ఎక్కడెక్కడి దూరతీరాలలోనో 

ఒంటరిగా సాగడం నేర్చాను 

అడుగడుగునా ఎదురౌతున్న నాలాటి వారెందరినో చూస్తూ 

పరిచయం లేకున్నా 

ఎవరికీ వారు అహమనే ఏకసూత్రబద్దులే అంటున్నాను. ఏమంటావ్?

బాబ్బాబు! ఆవును కాదనలేని ప్రశ్న వేసి 

మరో అంతర్యుద్ధానికి నా మనసుని వేదిక చేయకు ప్లీజ్. 

**********